SÁNUSAFARÍ

Farþegar koma sér á Keflavíkurflugvöll á eigin vegum. Flogið er rétt eftir miðnætti og lent í Ríga snemma morguns 24. september. Eftir lendingu verður hópurinn sóttur á flugvöllinn og ekið til Sigulda, fallegs smábæjar í um klukkustundar fjarlægð frá flugvellinum. Þar gefst tækifæri til að fá sér morgunmat, rölta um bæinn og kynnast öðrum í hópnum. Að því loknu förum við með kláf yfir ána Gauja og heimsækjum Turaida-kastalann, sem hófst að byggja árið 1214 og er reistur úr áberandi rauðum múrsteinum. Einnig verður gengið um kastalasvæðið þar sem finna má höggmyndir í fallegu sígrænu skóglendi. Eftir innritun í Ziedlejas gefst tími til að slaka á eftir langt ferðalag í fallegu umhverfi og njóta notalegra húsa fram að kvöldmat, þar sem einkakokkur sér um að elda dýrindis máltíð fyrir hópinn.

Innifalið: kvöldmatur

Við njótum þess að dvelja í hinni friðsælu Ziedlejas og förum á fræðandi og skemmtilegt námskeið um Pirts, sem er lettneska orðið yfir sánumenningu Letta. Við fáum frábæra kennara sem segja okkur áhugaverðar staðreyndir og kenna okkur hvernig nota má sánuprops til þess að fá sem mest úr út Pirts upplifuninni. Þau kenna okkur að gera trjávendi og maska í náttúrunni og svo fáum við að fara inní hlýja sánuna þar sem við notum það sem við gerðum yfir daginn.
Innifalið: hádegismatur og kvöldmatur

Næstu þrjá daga gefst okkur nægur tími til að slaka á og njóta húsanna og náttúrunnar í kring. Við tökum þátt í djúpum og endurnærandi sánumeðferðum þar sem áhersla er lögð á að hægja á, róa taugakerfið og gefa líkama og huga tækifæri til að endurnærast. Á svæðinu eru þrjár stórkostlegar sánur, hver með sinn einstaka karakter, hefðir og meðferðir. Þannig fáum við að upplifa fjölbreytta sánumenningu Eystrasaltsríkjanna á einstakan og eftirminnilegan hátt sem erfitt er að lýsa með orðum. Í frítíma gefst þér tækifæri til að slaka á, lesa góða bók, koma með okkur í jóga, fá þér heitt kakó, leigja hjól eða ganga um hinn fallega Gauja-þjóðgarð. Ziedlejas er staður þar sem þú getur kúplað þig út úr amstri dagsins og notið kyrrðar, vellíðunar og nærveru í hlýlegu og slakandi umhverfi.
Innifalið: hádegismatur og kvöldmatur

Við kveðjum paradísina Ziedlejas og höldum af stað í ný ævintýri. Við verðum sótt og heimsækjum heillandi býflugnabýli þar sem við fræðumst um býflugnarækt, smökkum ljúffengt hunang og fáum innsýn í þetta mikilvæga handverk. Fyrir þau sem vilja taka með sér smá bragð af Lettlandi heim er þetta frábært tækifæri til að kaupa hrátt gæðahunang beint frá framleiðanda. Á leiðinni til Ríga stoppum við á fallegum veitingastað og njótum dýrindis hádegisverðar áður en við höldum áfram til höfuðborgarinnar. Þar dveljum við síðustu nótt ferðarinnar á hóteli í borginni. Í Ríga gefst frjáls tími til að rölta um hinn sögufræga gamla miðbæ, skoða skemmtilega markaði, versla eða einfaldlega njóta líflegs borgarlífsins. Einnig er tilvalið að heimsækja lettneskt sánubaðhús eða nýta tímann til að slaka á og njóta síðasta kvöldsins í ferðinni.
Innifalið: hádegismatur

Í Riga verður frjáls tími allan daginn til að njóta borgarinnar á eigin hraða áður en flogið er heim seint um kvöldið. Gamli bærinn, Vecrīga, er fullur af þröngum steinlögðum götum, litríkum húsum og fallegum kaffihúsum þar sem tilvalið er að setjast niður og fylgjast með mannlífinu. Hægt er að skoða helstu kennileiti borgarinnar á borð við Riga Cathedral, St. Peter's Church með stórkostlegu útsýni yfir borgina og House of the Black Heads, smakka lettneskan mat, fara í spa eða versla af hjartans lyst — enda fylgir 23 kg innrituð taska með heim, svo það er alveg pláss fyrir smá aukafarangur.
Innifalið: morgunmatur